ပြည်ထောင်စုရွေးကောက်ပွဲကော်မရှင်

ပြည်ထောင်စုရွေးကောက်ပွဲကော်မရှင်၏ ဆောင်ပုဒ်

ယုံကြည်စိတ်ချရသော ရွေးကောက်ပွဲများဖြင့် ဒီမိုကရေစီသို့ လမ်းခင်းခြင်း

ခိုင်မာသော ဒီမိုကရေစီစနစ် တည်ဆောက်နိုင်ရန် လူတိုင်းကို တန်းတူအခွင့်အရေးပေး၍ ပွင့်လင်းမြင်သာပြီး ဘက်မလိုက်သော နည်းလမ်းဖြင့် လွတ်လပ်၊ တရားမျှတ၍ ယုံကြည်စိတ်ချရသော ရွေးကောက်ပွဲများ ကျင်းပရန်။

ကော်မရှင်၏ တာဝန်နှင့် လုပ်ပိုင်ခွင့်များမှာ အောက်ပါအတိုင်းဖြစ်သည်။

(က) လွှတ်တော်ရွေးကောက်ပွဲများ ကျင်းပခြင်း။

(ခ) လွှတ်တော်ရွေးကောက်ပွဲများကို ကြီးကြပ်ခြင်းနှင့် ကြီးကြပ်စေခြင်း။

(ဂ) အဆင့်ဆင့်သော ကော်မရှင်အဖွဲ့ခွဲများ ဖွဲ့စည်းခြင်း၊ ဖွဲ့စည်းစေခြင်း၊ ကြီးကြပ်ခြင်းနှင့် ကြီးကြပ်စေခြင်း။

(ဃ) မဲဆန္ဒနယ်များ သတ်မှတ်ခြင်းနှင့် ပြင်ဆင်ခြင်း။

(င) မဲစာရင်းများ ပြုစုခြင်း၊ ပြုစုစေခြင်း၊ ပြင်ဆင်ခြင်းနှင့် ပြင်ဆင်စေခြင်း။

(စ) သဘာဝဘေးအန္တရာယ် သို့မဟုတ် ဒေသလုံခြုံရေးအခြေအနေကြောင့် လွတ်လပ်၍ တရားမျှတသော ရွေးကောက်ပွဲ မကျင်းပနိုင်သည့် မဲဆန္ဒနယ်များ၌ ရွေးကောက်ပွဲကို ရွှေ့ဆိုင်းခြင်းနှင့် ပယ်ဖျက်ခြင်း။

(ဆ) လွှတ်တော်ကိုယ်စားလှယ်အဖြစ် အသိအမှတ်ပြုလက်မှတ် ထုတ်ပေးခြင်း။

(ဇ) ရွေးကောက်ပွဲဆိုင်ရာ အငြင်းပွားမှုများ စစ်ဆေးနိုင်ရန် ဥပဒေနှင့်အညီ ရွေးကောက်ပွဲခုံအဖွဲ့များ ဖွဲ့စည်းခြင်း။

(ဈ) ဖွဲ့စည်းပုံအခြေခံဥပဒေ ပုဒ်မ ၂၇၆၊ ပုဒ်မခွဲ (ဇ) အရ ကိုယ်ပိုင်အုပ်ချုပ်ခွင့်ရတိုင်း သို့မဟုတ် ဒေသဦးစီးအဖွဲ့ဝင်ကို ရွေးချယ်ခန့်အပ်ရာတွင် ကန့်ကွက်ချက်ရှိပါက စစ်ဆေးဆုံးဖြတ်နိုင်ရန် ရွေးကောက်ပွဲခုံအဖွဲ့များ ဖွဲ့စည်းခြင်း။

(ည) သက်ဆိုင်ရာမဲဆန္ဒနယ်၏ မူလမဲဆန္ဒရှင် အနည်းဆုံး တစ်ရာခိုင်နှုန်းက ဖွဲ့စည်းပုံအခြေခံဥပဒေ ပုဒ်မ ၃၉၆၊ ပုဒ်မခွဲ (က) နှင့် (ခ) အရ လွှတ်တော်ကိုယ်စားလှယ်ကို တာဝန်မှ ပြန်လည်ရုပ်သိမ်းလိုကြောင်း ကော်မရှင်သို့ တင်ပြပါက ယင်းပုဒ်မခွဲ (ဂ)၊ (ဃ)၊ (င) တို့နှင့်အညီ စစ်ဆေးဆောင်ရွက်ခြင်း။

(ဋ) ကော်မရှင်အဖွဲ့ခွဲအဆင့်ဆင့်အတွက် ရန်ပုံငွေခွဲဝေပေးခြင်းနှင့် အသုံးစရိတ်များကို ကြီးကြပ်ခြင်း၊ ကြီးကြပ်စေခြင်း။

(ဌ) နိုင်ငံရေးပါတီများ ဥပဒေနှင့်အညီ ဆောင်ရွက်နိုင်ရေးအတွက် ကြီးကြပ်ခြင်း၊ ကြီးကြပ်စေခြင်းနှင့် လမ်းညွှန်ခြင်း။

(ဍ) ဥပဒေတစ်ရပ်ရပ်က ပေးအပ်သော အခြားတာဝန်များ ထမ်းဆောင်ခြင်း။

အောက်ပါကိစ္စရပ်များနှင့်စပ်လျဉ်း၍ ကော်မရှင်၏ ဆုံးဖြတ်ချက်နှင့် ဆောင်ရွက်ချက်များသည် အပြီးအပြတ်ဖြစ်သည်။

(က) ရွေးကောက်ပွဲဆိုင်ရာ လုပ်ငန်းများ။

(ခ) ရွေးကောက်ပွဲခုံအဖွဲ့များ၏ ဆုံးဖြတ်ချက်နှင့် အမိန့်များအပေါ် အယူခံနှင့် ပြင်ဆင်မှုများ။

(ဂ) နိုင်ငံရေးပါတီဆိုင်ရာ ဥပဒေအရ ဆောင်ရွက်သည့် ကိစ္စများ။

www.uec.gov.mm

info@e-uec.gov.mm