ဒစ်ဂျစ်တယ်ဖွံ့ဖြိုးတိုးတက်ရေးနှင့် ဆက်သွယ်ရေးဝန်ကြီးဌာန

၁၉၄၈ ခုနှစ်၊ မြန်မာနိုင်ငံလွတ်လပ်ရေးရရှိသည့်အချိန်တွင် သယ်ယူပို့ဆောင်ရေးနှင့် ဆက်သွယ်ရေးလုပ်ငန်းများကို ရေကြောင်းနှင့်မြို့ပြလေကြောင်းဝန်ကြီးဌာနနှင့် သယ်ယူပို့ဆောင်ရေး၊ စာတိုက်နှင့် ကြေးနန်းဆက်သွယ်ရေးဝန်ကြီးဌာနဟူ၍ ဝန်ကြီးဌာနနှစ်ခုခွဲ၍ ဖွဲ့စည်းခဲ့ပါသည်။

၁၉၆၁ ခုနှစ်တွင် အထက်ပါဝန်ကြီးဌာနနှစ်ခုကို ပေါင်းစည်း၍ သယ်ယူပို့ဆောင်ရေးနှင့် လမ်းပန်းဆက်သွယ်ရေးဝန်ကြီးဌာနအဖြစ် ပြောင်းလဲဖွဲ့စည်းခဲ့ပါသည်။ ထို့နောက် ၁၉၇၂ ခုနှစ်တွင် နိုင်ငံပိုင် စီးပွားရေးအဖွဲ့အစည်းများကို ကော်ပိုရေးရှင်း အမည်များဖြင့် ပြောင်းလဲ၍ ဝန်ကြီးဌာနကိုလည်း ပို့ဆောင်ဆက်သွယ်ရေးဝန်ကြီးဌာနဟူ၍ ပြင်ဆင်ဖွဲ့စည်းခဲ့ပါသည်။

၁၉၉၂ ခုနှစ်တွင် ပို့ဆောင်ရေးဝန်ကြီးဌာန၊ ရထားပို့ဆောင်ရေးဝန်ကြီးဌာနနှင့် ဆက်သွယ်ရေးစာတိုက်နှင့် ကြေးနန်းဝန်ကြီးဌာနဟူ၍ ဝန်ကြီးဌာန (၃) ခုအဖြစ် ပြန်လည်ပြင်ဆင်ဖွဲ့စည်းခဲ့ပြီး ဆက်သွယ်ရေး ဆိုင်ရာကိစ္စရပ်များအား ဝန်ကြီးဌာနတစ်ခုသီးသန့်ဖွဲ့စည်း၍ သီးခြားဆောင်ရွက်ခဲ့ပါသည်။

ဆက်သွယ်ရေး၊ စာတိုက်နှင့်ကြေးနန်းဝန်ကြီးဌာန စတင်ဖွဲ့စည်းစဉ်က ဦးစီးဌာန (၂) ခု၊ စီးပွားရေးအဖွဲ့စည်း (၁) ခု၊ စုစုပေါင်းဌာန (၃) ခု ပါဝင်ခဲ့ပါသည်။ ၎င်းတို့မှာ-

(က) ဆက်သွယ်ရေးညွှန်ကြားမှုဦးစီးဌာန (ခ) မိုးလေဝသနှင့်ဇလဗေဒညွှန်ကြားမှုဦးစီးဌာန (ဂ) မြန်မာ့ဆက်သွယ်ရေးလုပ်ငန်း

ဆက်သွယ်ရေး၊ စာတိုက်နှင့် ကြေးနန်းဝန်ကြီးဌာနအမည်ဖြင့် ဆောင်ရွက်နေခဲ့ရာမှ ၉-၁၁-၂၀၁၂ တွင် နိုင်ငံတော်သမ္မတရုံး၏ အမိန့်ကြော်ငြာစာအမှတ် (၈၃/၂၀၁၂) ဖြင့် ဆက်သွယ်ရေး၊ စာတိုက်နှင့် ကြေးနန်းဝန်ကြီးဌာနကို ဆက်သွယ်ရေးနှင့်သတင်းအချက်အလက်နည်းပညာဝန်ကြီးဌာနအဖြစ် အမည်ပြောင်းလဲသတ်မှတ်ခဲ့ပါသည်။

ဆက်သွယ်ရေးနှင့်သတင်းအချက်အလက်နည်းပညာဝန်ကြီးဌာနတွင် ဆက်သွယ်ရေးညွှန်ကြားမှုဦးစီးဌာနနှင့် မြန်မာ့ဆက်သွယ်ရေးလုပ်ငန်းဟူ၍ ဦးစီးဌာန (၁) ခု၊ လုပ်ငန်း (၁) ခုဖြင့် လုပ်ငန်းလည်ပတ်ဆောင်ရွက်ခဲ့ပါသည်။ ၂၀၁၅ ခုနှစ်၊ ဇန်နဝါရီလ ၁၅ ရက်တွင် ကျင်းပသည့် ပြည်ထောင်စုအစိုးရအဖွဲ့ အစည်းအဝေးအမှတ်စဉ် (၂/၂၀၁၅) အရ မြန်မာ့ဆက်သွယ်ရေးလုပ်ငန်းလက်အောက်မှ သတင်းအချက်အလက်နည်းပညာနှင့်ဆိုက်ဘာလုံခြုံရေးဦးစီးဌာနနှင့် မြန်မာ့စာတိုက်လုပ်ငန်းဟူ၍ သီးခြားအတည်ပြု တိုးချဲ့ဖွဲ့စည်းခဲ့ပါသည်။

၂၀၁၆ ခုနှစ်တွင် နိုင်ငံတော်သမ္မတရုံး၏ ၃၀-၃-၂၀၁၆ ရက်စွဲပါ အမိန့်အမှတ် (၃/၂၀၁၆) ဖြင့် ပို့ဆောင်ရေးဝန်ကြီးဌာန၊ ရထားပို့ဆောင်ရေးဝန်ကြီးဌာနနှင့် ဆက်သွယ်ရေးနှင့်သတင်းအချက်အလက်နည်းပညာဝန်ကြီးဌာနတို့အား ပြန်လည်ပေါင်းစည်း၍ ပို့ဆောင်ရေးနှင့်ဆက်သွယ်ရေးဝန်ကြီးဌာနအဖြစ် ပြောင်းလဲပြင်ဆင် ဖွဲ့စည်းဆောင်ရွက်ခဲ့ပါသည်။

၂၀၂၆ ခုနှစ်၊ ဧပြီလ ၆ ရက်နေ့တွင် ကျင်းပပြုလုပ်သည့် ပြည်ထောင်စုလွှတ်တော် တတိယအကြိမ်အစည်းအဝေးတွင် ယခင်ပို့ဆောင်ရေးနှင့် ဆက်သွယ်ရေးဝန်ကြီးဌာနမှ ဒစ်ဂျစ်တယ်ဖွံ့ဖြိုးတိုးတက်ရေးနှင့် ဆက်သွယ်ရေးဝန်ကြီးဌာနဟူ၍ သီးခြားဖွဲ့စည်းခဲ့ပါသည်။

၂၀၂၆ ခုနှစ်၊ ဇွန်လ ၉ ရက်နေ့တွင် ကျင်းပပြုလုပ်သည့် ပြည်ထောင်စုသမ္မတမြန်မာနိုင်ငံတော်၊ ပြည်ထောင်စုအစိုးရအဖွဲ့အစည်းအဝေး အမှတ်စဉ် (၄/၂၀၂၆) ၏ သဘောတူခွင့်ပြုချက်ဖြင့် ဒီဂျစ်တယ်ဖွံ့ဖြိုးတိုးတက်ရေးနှင့်ဆက်သွယ်ရေးဝန်ကြီးဌာန၏ ဖွဲ့စည်းပုံကို ဝန်ကြီးရုံးနှင့် ဦးစီးဌာန/လုပ်ငန်း ၇ ခုတို့ဖြင့် အရာထမ်းရာထူး (၁၃၄၂) နေရာ၊ အမှုထမ်းရာထူး (၁၅၈၆၈) နေရာဖြင့် တိုးချဲ့ပြင်ဆင် ဖွဲ့စည်းခဲ့ပါသည်။

၁။ နိုင်ငံတစ်ဝန်းရှိ လူတိုင်း ဆက်သွယ်ရေးဝန်ဆောင်မှုများနှင့် နည်းပညာများအား လက်လှမ်းမီ အသုံးပြုနိုင်စွမ်းရှိစေရန်။ ၂။ အစိုးရဝန်ဆောင်မှုများကို ပြည်သူများလွယ်ကူစွာရရှိစေရန်နှင့် အစိုးရဌာနတွင်းလုပ်ငန်းစဉ်များ ခေတ်မီစေရန်။ ၃။ ဒီဂျစ်တယ်စနစ်များကို အသုံးပြုရာတွင် ဘေးကင်းလုံခြုံမှုရှိစေရန်။ ၄။ စီးပွားရေးကဏ္ဍတွင် ဒီဂျစ်တယ်နည်းပညာအား ပိုမိုအသုံးပြုနိုင်စေရန်။ ၅။ အဆင့်မြင့်ဒီဂျစ်တယ်ဆက်သွယ်ရေးနည်းပညာများကိုအသုံးချနိုင်ရေး တွန်းအားပေးဆောင်ရွက် သွားရန်။ ၆။ နိုင်ငံတကာနှင့်ရင်ပေါင်တန်းနိုင်သည့် သတင်းအချက်အလက်နည်းပညာရှင်များ ပြုစုပျိုးထောင်ပေးရန်။

နိုင်ငံတော်အတွင်း အားလုံးပါဝင်နိုင်ပြီး ဆန်းသစ်၍ လုံခြုံစိတ်ချရသော ဒီဂျစ်တယ်ဝန်ဆောင်မှုများ၊ အခြေခံအဆောက်အအုံများ၊ လူ့စွမ်းအားအရင်းအမြစ်များဖြင့် နိုင်ငံတကာအဆင့်ဒီဂျစ်တယ်နှင့် ဆက်သွယ်ရေးနည်းပညာများ ဖွံ့ဖြိုးတိုးတက်စေရေး အကောင်အထည်ဖော်ဆောင်ရွက်ရမည်။

(က) ဒီဂျစ်တယ်နှင့်ဆက်သွယ်ရေးကဏ္ဍ တိုးတက်စေရေးအတွက် ဥပဒေ၊ နည်းဥပဒေ၊ အမိန့်ညွှန်ကြားချက်၊ လုပ်ထုံး လုပ်နည်း စသည်တို့ကို ရေးဆွဲဆောင်ရွက်ခြင်း။ (ခ) နိုင်ငံတော်၏ ဒီဂျစ်တယ်စီးပွားရေးနှင့် ဒီဂျစ်တယ်လူ့အဖွဲ့အစည်း ဖြစ်ပေါ်လာစေရန် ဒီဂျစ်တယ်အသွင်ကူးပြောင်းရေးမဟာဗျူဟာ ချမှတ်ခြင်း၊ လုပ်ငန်းစီမံကိန်းများ ရေးဆွဲခြင်း၊ ဆန်းစစ်လေ့လာအကဲဖြတ်ခြင်း၊ ဒီဂျစ်တယ်နည်းပညာသစ်များ သုတေသနပြုလုပ်ခြင်း။ (ဂ) အစိုးရ၏ ဝန်ဆောင်မှုများကို ပြည်သူများအလွယ်တကူရရှိစေရန်နှင့် အစိုးရ၏လုပ်ငန်းစဉ်များကို ခေတ်မီစေရေး ဒီဂျစ်တယ်နည်းပညာ အသုံးပြု၍ အရှိန်အဟုန်မြှင့် အကောင်အထည်ဖော်ဆောင်ရွက်ခြင်း။ (ဃ) နိုင်ငံတော်၏ ဒီဂျစ်တယ်အသွင်ကူးပြောင်းမှုကို အရှိန်အဟုန်မြှင့်တင်ရန်အတွက် အဆင့်မြင့်နည်းပညာများ အသုံးချနိုင်ရေး သက်ဆိုင်ရာ ဝန်ကြီးဌာနများနှင့် ပူးပေါင်းဆောင်ရွက်ခြင်း။ (င) ဆက်သွယ်ရေးကဏ္ဍတွင် ပွင့်လင်းမြင်သာမှုရှိသော ယှဉ်ပြိုင်မှုများဖြင့် ပုဂ္ဂလိကပါဝင်မှု အခန်းကဏ္ဍကို မြှင့်တင်ပြီး နိုင်ငံတစ်ဝန်း ဆက်သွယ်ရေးကွန်ရက်များ လွှမ်းခြုံနိုင်ရေး ဆောင်ရွက်ခြင်း။ (စ) မြန်မာနိုင်ငံ၏ ဆိုက်ဘာနယ်နိမိတ်အတွင်း ဆိုက်ဘာလုံခြုံရေးကျိုးပေါက်မှုများကို စောင့်ကြည့်တုံ့ပြန်ခြင်း၊ ဆိုက်ဘာ အလွဲသုံးစားပြုမှုများကို တားဆီးခြင်း၊ ဆိုက်ဘာအသိပညာပေးလုပ်ငန်းများ ဆောင်ရွက်ခြင်း။ (ဆ) အရည်အသွေးမြင့်ဆက်သွယ်ရေးဝန်ဆောင်မှုလုပ်ငန်းများကို သင့်တင့်သည့်နှုန်းထားဖြင့် သုံးစွဲနိုင်ရေး ဆောင်ရွက်ခြင်း။ (ဇ) အရည်အသွေးပြည့်မီသော စာတိုက်ဝန်ဆောင်မှုများကို သင့်တင့်မျှတသည့်ဈေးနှုန်းဖြင့် ခေတ်မီနည်းပညာများသုံးစွဲပြီး နိုင်ငံတစ်ဝန်းရှိ ပြည်သူများကိုဝန်ဆောင်မှုပေးရန် ဆောင်ရွက်ခြင်း။

ပြည်ထောင်စုဝန်ကြီး       ဒုတိယဝန်ကြီး (ဒီဂျစ်တယ်)   ဒုတိယဝန်ကြီး (ဆက်သွယ်ရေး)         အမြဲတမ်းအတွင်းဝန်   ဒုတိယအမြဲတမ်းအတွင်းဝန်                   ဒီဂျစ်တယ်ဖွံ့ဖြိုးတိုးတက်ရေးဦးစီးဌာန သတင်းအချက်အလက်နည်းပညာ ဦးစီးဌာန အမျိုးသားဉာဏ်ရည်တု နည်းပညာဖွံ့ဖြိုးတိုးတက်ရေး ဦးစီးဌာန ဆက်သွယ်ရေးညွှန်ကြားမှု ဦးစီးဌာန ဆိုက်ဘာလုံခြုံရေး ဦးစီးဌာန မြန်မာ့ဆက်သွယ်ရေးလုပ်ငန်း မြန်မာ့စာတိုက်လုပ်ငန်း